Цаг үе - Говьсүмбэр аймаг

Говьсүмбэр аймагт тэмбүүгийн өвчлөл хамгийн өндөр байна

zulaa — Tue, 20 Oct 2026 16:29:26 +0800

Бэлгийн замаар дамжих халдвар зөвхөн Монгол Улсад төдийгүй дэлхий дахинд нийгмийн эрүүл мэндийн тулгамдсан асуудлын нэг хэвээр байна. Монгол Улсад эдгээр халдвар бэлгийн идэвхтэй амьдралтай 19–34 насныхны дунд харьцангуй өндөр бүртгэгддэг бөгөөд залуучуудын мэдлэг, мэдээлэл дутмаг, бэлгэвчийн хэрэглээ тогтмол биш байгаа нь халдвар тархах эрсдэлийг нэмэгдүүлдэг байна.

Бэлгийн замаар 30 гаруй төрлийн халдвар дамждаг гэж үздэг. Монгол Улсад тэмбүү, заг хүйтэн, трихомониаз, ХДХВ зэрэг халдварууд зонхилон бүртгэгддэг. Халдварын эрсдэлийг мэддэг хэрнээ “зүгээр байлгүй дээ” гэж бодон хамгаалалтгүй бэлгийн хавьталд орох нь халдвар авах, цаашлаад бусдад дамжуулах шалтгаан болдог. Мөн гэр бүлтэй хүмүүсийн дунд ч халдвар бүртгэгдсээр байгаа нь урьдчилан сэргийлэлт хүн бүрд хамаатай асуудал болохыг харуулж байна.

2026 оны эхний 9 сарын байдлаар Монгол Улсын хэмжээнд бэлгийн замаар дамжих халдварын 6679 тохиолдол бүртгэгдсэн нь нийт халдварт өвчний 18.8 хувийг эзэлж байна. Энэ нь өмнөх оны мөн үеэс 889 тохиолдлоор буурсан үзүүлэлт юм.

Нийт тохиолдлын 44.6 хувийг тэмбүү, 33.7 хувийг заг хүйтэн, 21.3 хувийг трихомониаз, 0.4 хувийг ХДХВ/ДОХ эзэлж байна.

Өөрөөр хэлбэл, бүртгэгдсэн бэлгийн замаар дамжих халдварын бараг тал хувийг тэмбүүгийн тохиолдол бүрдүүлжээ.

Гэхдээ өмнөх оны мөн үетэй харьцуулахад тэмбүүгийн өвчлөл 256 тохиолдлоор буурсан байна. Харин 10000 хүн амд ногдох тэмбүүгийн өвчлөлийн үзүүлэлтээр Говьсүмбэр аймаг 17.1, Өмнөговь аймаг 15.7, Сүхбаатар аймаг 11.3, Дорноговь болон Дорнод аймаг тус бүр 9.2, Улаанбаатар хот 11.1 байгаа нь улсын дунджаас өндөр үзүүлэлт болж байна.

Бэлгийн замаар дамжих халдварын хамгийн аюултай талуудын нэг нь зарим тохиолдолд ямар ч тодорхой шинж тэмдэг илэрдэггүй явдал юм. Халдвар авсан хүн өөрийгөө эрүүл гэж бодон явсаар өвчнийг бусдад дамжуулах, эмчилгээ хийлгэхгүй удсанаар хүндрэл үүсэх эрсдэлтэй.

Харин шинж тэмдэг илэрсэн ч эмчид хандахгүй, дур мэдэн эм хэрэглэх нь асуудлыг улам хүндрүүлдэг байна.

Түүнчлэн нэг хүн нэгэн зэрэг хоёр болон түүнээс дээш халдвар авах боломжтой. Эдгээр халдварын шинж тэмдэг төстэй байж болох тул зөвхөн гаднах шинж тэмдгээр нь ялгаж, ямар эм хэрэглэхээ шийдэх боломжгүй. Бусдын зөвлөгөө, интернэт дэх мэдээлэлд үндэслэн антибиотик дур мэдэн хэрэглэх нь халдварыг бүрэн эмчлэхгүй байх, шинж тэмдгийг түр бүдгэрүүлэх, нянгийн антибиотикт тэсвэржилт үүсэх эрсдэлийг нэмэгдүүлдэг. Тиймээс бэлгийн замын халдварын сэжигтэй шинж тэмдэг илэрсэн эсэхээс үл хамааран эрсдэлтэй хавьталд орсон бол шинжилгээ өгч, шаардлагатай эмчилгээг мэргэжлийн эмчийн заавраар хийлгэх нь чухал юм.

ЖИРЭМСЭН ЭХЧҮҮД ШИНЖИЛГЭЭГЭЭ ХУГАЦААНД НЬ ӨГӨХ ХЭРЭГТЭЙ

Бэлгийн замаар дамжих халдвар жирэмсэн эхээс урагт дамжих эрсдэлтэй. Гэхдээ жирэмсний хяналтад эрт хамрагдаж, шаардлагатай шинжилгээг цаг тухайд нь өгч, халдвар илэрвэл тохирсон эмчилгээ хийлгэснээр энэ эрсдэлийг бууруулах боломжтой.

2024 оны эхний найман сарын байдлаар улсын хэмжээнд жирэмсний хяналтад шинээр 38,648 эмэгтэй хамрагджээ. Тэдгээрээс трихомониаз илрүүлэх шинжилгээнд 92.5 хувь, заг хүйтэн илрүүлэх шинжилгээнд 92.4 хувь, тэмбүү илрүүлэх шинжилгээнд 98.8 хувь, ХДХВ илрүүлэх шинжилгээнд 97.9 хувь нь хамрагдсан байна.

Эдгээр үзүүлэлт жирэмсний хяналтын хүрээнд халдвар илрүүлэх шинжилгээ чухал байр суурь эзэлж байгааг харуулж байна. Гэхдээ шинжилгээнд хамрагдсан байх нь дангаараа хангалтгүй бөгөөд халдвар илэрсэн тохиолдолд эмчилгээг бүрэн хийлгэх шаардлагатай.

БЗДХ-ЫН ЭМЧИЛГЭЭ ЗӨВХӨН НЭГ ХҮНЭЭР ХЯЗГААРЛАГДАХГҮЙ

Бэлгийн замаар дамжих халдвар илэрсэн тохиолдолд зөвхөн өөрөө эмчлүүлээд зогсохгүй бэлгийн хамтрагчаа мөн шинжилгээ, шаардлагатай эмчилгээнд хамруулах нь чухал. Эс бөгөөс нэг нь эмчлүүлсэн ч нөгөө нь халдвартай хэвээр үлдэж, дахин халдвар дамжуулах эрсдэлтэй.

Монгол Улсын 21 аймаг, Улаанбаатар хотын есөн дүүрэгт БЗДХ-ын тусламж, үйлчилгээ үзүүлэх кабинет ажиллаж байгаа бөгөөд иргэд мэргэжлийн эмчид хандан зөвлөгөө авах, шинжилгээ өгөх, шаардлагатай эмчилгээ хийлгэх боломжтой.

Бэлгийн замаар дамжих халдварын талаар ичиж, санаа зовсноос эмнэлэгт хандахгүй байх нь эрсдэлийг нэмэгдүүлдэг. Халдварын шинж тэмдэггүй байсан ч эрсдэлтэй хавьталд орсон бол шинжилгээ өгөх, бэлгэвч тогтмол хэрэглэх, халдвар илэрвэл хамтрагчтайгаа хамт эмчлүүлэх нь өөрийгөө болон бусдыг хамгаалах хамгийн чухал алхам юм.

https://news.mn/r/2893891/

Говьсүмбэр аймагт зохион байгуулж байгаа Гамшгаас хамгаалах команд-штабын сургууль эхэллээ

zulaa — Thu, 12 Mar 2026 09:11:35 +0800

Монгол Улсын Шадар сайдын баталсан хуваарийн дагуу Говьсүмбэр аймагт Онцгой байдлын ерөнхий газраас зохион байгуулж байгаа Гамшгаас хамгаалах команд штабын сургууль аймаг, сумдын удирдах бүрэлдэхүүний танхимын сургалтаар эхэллээ.

Команд штабын сургуулийг гамшгаас хамгаалах улсын алба, аймаг, сумдын удирдлагын бэлэн байдлыг үнэлэх, болзошгүй гамшиг, аюулт үзэгдлийн үед удирдлага, зохион байгуулалт, харилцан ажиллагааг сайжруулах, шийдвэр гаргалт, мэдээлэл солилцооны шуурхай байдлыг нэмэгдүүлэх зорилгоор зохион байгуулдаг онцлогтой юм.

Сургуулийн нээлтийн ажиллагаанд ОБЕГ-ын дэд дарга, хурандаа Ц.Уранчимэг, Говьсүмбэр аймгийн Засаг дарга Т.Бат-Эрдэнэ, аймаг сумдын 80 гаруй удирдах бүрэлдэхүүн, гамшгаас хамгаалах албадын төлөөлөл оролцсон юм.

Хурандаа Ц.Уранчимэг хэлсэн үгэндээ “Уур амьсгалын өөрчлөлт, байгалийн болон технологийн гаралтай аюулт үзэгдэл, ослын давтамж, хор уршиг нэмэгдэж байгаа өнөөгийн нөхцөлд гамшгийн эрсдэлийг бууруулах, бэлэн байдлыг хангах, байгууллагуудын хамтын ажиллагааг бэхжүүлэхэд команд-штабын сургууль, дадлагын ач холбогдол өндөр байна. Говьсүмбэр аймгийн хэмжээнд сүүлийн 5 жилийн хугацаанд гамшиг, аюулт үзэгдэл, ослын нийт 240 удаагийн дуудлага бүртгэгдэж, 37 иргэн амь насаа алдаж, 1116 хүн гэмтэж бэртэн, өвчилж, 878 толгой мал хорогдон, 3.7 тэрбум төгрөгийн шууд хохирол учирсан. Бүртгэгдсэн тохиолдлын 50.4 хувийг обьектын гал түймэр, 15.8 хувийг цас, шаварт суусан дуудлага, 7.9 хувийг зам тээврийн осол, 7.5 хувийг төөрсөн, сураггүй болсон тохиолдол эзэлж байна. Түүнчлэн аймгийн хэмжээнд жилд дунджаар 48 удаагийн гамшиг, аюулт үзэгдэл, ослын дуудлага бүртгэгддэг бөгөөд хүн амын тоонд харьцуулахад 100.000 хүн амд жилд дунджаар 266 дуудлага ногдож байгаа нь улсын хэмжээнд аюулт үзэгдлийн тохиолдлоор эхний 5 аймгийн нэгт багтаж байна” хэмээн онцоллоо.

Харин аймгийн Засаг дарга Т.Бат-Эрдэнэ “Дорноговь, Дундговь зэрэг хөрш зэргэлдээ аймгуудаас отор нүүдлээр ирэх малчдын хөдөлгөөн их байдаг нь шүлхий зэрэг малын гоц халдварт өвчний эрсдэлийг нэмэгдүүлэх нөхцөл бүрдүүлж байна. Мөн аймгийн нутаг дэвсгэрээр өдөрт дунджаар 1000 гаруй ачаа тээврийн автомашин зорчдог нь замын ачааллыг нэмэгдүүлж, зам тээврийн осол, зөрчил нэмэгдэх хандлага ажиглагдаж байна. Иймд болзошгүй эрсдэлийг бууруулах, урьдчилан сэргийлэх чиглэлээр холбогдох байгууллагуудын хамтын ажиллагаа, бэлэн байдлыг хангах нь чухал байна” гэж хэлсэн үгэндээ танилцуулсан юм.

Тус команд штабын сургууль нь удирдах бүрэлдэхүүний танхимын сургалт, штабын дадлага, сорил гэсэн 3 үе шаттайгаар 3 өдөр үргэлжлэх бөгөөд гамшгийн үед удирдлагын шийдвэр гаргалт, байгууллагуудын харилцан ажиллагаа, хариу арга хэмжээний бэлэн байдлыг үнэлж, сайжруулахад чиглэгдэж байна.

“Аюулгүй амьдрах ухаан” хөтөлбөрийн сургагч багш бэлтгэх сургалт Говьсүмбэр аймгаас эхэллээ

zulaa — Wed, 11 Mar 2026 09:31:17 +0800

Монгол Улсын Шадар сайдын аймаг, орон нутгийн Засаг дарга нартай байгуулсан гэрээний хэрэгжилтийг хангах, Боловсролын ерөнхий хуулийн 14.4-т "Бүх түвшний боловсролын сургалтын хөтөлбөрт дараах агуулгыг заавал тусгаж, боловсролын сургалтын байгууллага өмчийн хэлбэр харгалзахгүй хэрэгжүүлнэ" гэж заасны дагуу “Аюулгүй амьдрах ухаан” сургалтын сургагч багш бэлтгэх ажлыг улс орон даяар үе шаттайгаар зохион байгуулж эхэллээ.

Анхны сургалтад Говьсүмбэр аймгийн Сүмбэр, Шивээговь, Баянтал сумдын ерөнхий боловсролын сургууль, цэцэрлэг, Политехник коллежийн нийт 54 эрхлэгч, багш, ажилтан нарыг хамруулж,сургагч багшаар бэлтгэлээ.

Тус сургалт нь жилээс жилд өсөн нэмэгдэж байгаа уур амьсгалын өөрчлөлт, байгаль цаг уурын гаралтай гамшиг, аюулт үзэгдэл, ослын эрсдэлээс өөрийгөө болон бусдыг хамгаалах мэдлэг, чадварыг боловсролын байгууллагын түвшинд түгээн дэлгэрүүлэх зорилгын хүрээнд зохион байгуулагдаж байгаа гэдгээрээ онцлог юм.

Ингэснээр гамшгийн эрсдэлийг бууруулах, урьдчилан сэргийлэх агуулгыг сургууль болон сургуулийн өмнөх боловсролын байгууллагаар дамжуулан хүүхэд, багачууд, суралцагчдад системтэй хүргэх боломж бүрдлээ.

Онцгой байдлын ерөнхий газраас Боловсролын ерөнхий газартай хамтран хэрэгжүүлж байгаа тус сургалтыг цаашид улсын хэмжээний 876 сургуулийн багш нарыг сургагч багшаар бэлтгэн, 24 цагийн модуль хөтөлбөрөөр “Аюулгүй амьдрах ухаан” сургалтыг жигд, хүртээмжтэй хүргэх зорилтыг хэрэгжүүлэн ажиллаж байна.

Сургалтыг орон даяар зохион байгуулснаар гамшгаас хамгаалах боловсролыг бүх шатны боловсролын байгууллагыг бэхжүүлэх, хүүхэд, багачуудын аюулгүй байдлын мэдлэг, дадлыг нэмэгдүүлэх, эрсдэлийн талаарх зөв ойлголтыг төлөвшүүлэхэд чухал хувь нэмрээ оруулах юм.

Замд зогсож байсан машины араас мөргөж, нэг хүний амь хохирсон осол гарчээ

zulaa — Wed, 31 Dec 2025 15:16:24 +0800

Цагдаагийн байгууллагад энэ оны 12 дугаар сарын 29-ний өдөр Говьсүмбэр аймгийн нутаг дэвсгэрт “Ачааны машинууд мөргөлдсөн байна” гэх дуудлага мэдээлэл ирүүлснийг шалгахад жолооч нь Бэйбэн норт бенз маркийн тээврийн хэрэгслийг жолоодож яваад зам дээр зогсож байсан Норт бенз маркийн тээврийн хэрэгслийн араас мөргөсний улмаас Норт бенз маркийн тээврийн хэрэгслийн жолооч амь хохирсон нөхцөл байдал тогтоогдож, тус хэрэгт Говьсүмбэр аймгийн цагдаагийн газар шалгалтын ажиллагааг явуулж байна.

Иймд жолооч та

Тээврийн хэрэгслийн хурдыг замын нөхцөлд тохируулах,

Хэт ядарсан үедээ жолоо барихгүй байх,

Зайлшгүй зогсолт хийсэн тохиолдолд аюулгүй байдлыг хангаж, бусдад анхааруулах,

Зорчих хэсгийг чөлөөлөх,

Ослын дохионы гэрлээ асаах, ослын тэмдэг байршуулах зэрэг арга хэмжээ авч, бусдын амь нас, эрүүл мэнд, эд хөрөнгийг болзошгүй эрсдэлээс урьдчилан сэргийлэхийг цагдаагийн байгууллагаас анхааруулж байна.

Х.Тэмүүжиний ойрын хүмүүсийг баривчилжээ

zulaa — Thu, 11 Sep 2025 15:40:02 +0800

“…УИХ-ын нэр бүхий зарим гишүүнд хэрэг үүсгэж, Улсын ерөнхий прокурор намрын чуулган эхлэхээр бүрэн эрхийг нь түдгэлзүүлэх асуудлыг орцулахаао зэхэж байна” гэдэг яриа гараад удсан. АН-ын голдуу гишүүдийн нэр дуулдсан.

Тэдний нэгээр УИХ-ын гишүүн Х.Тэмүүжин нэрлэгдээд байсан. Учир нь, Х.Тэмүүжин Үндсэн хуулийн тогтвортой байдлыг хангах санаачилга гарган намынхаа бүлгийн гишүүдээр гарын үсэг цуглуулсан. Ингэхдээ “…Хуулийн төсөл боловсруулах асуудал энд яригдахгүй. Харин бүлэг улс төрийн шийдвэрээ гаргасан. Цэцээр дамжуулж Үндсэн хуулийн өөрчлөлтийг хийх юм биш биз гэсэн болгоомжлол ч байна. Учир нь өмнө нь УИХ-ын гишүүдийн давхар дээлтэй холбоотой асуудал цэцийг ашиглах замаар Үндсэн хуулийн хулгай хийсэн байдаг. Тиймээс Үндсэн хуулийн хулгай аль ч замаар орж ирэхийг үгүйсгэхгүй. Ямар замаар орж ирж байгаа нь сонин биш. Эцсийн үр дүн нь чухал.

УИХ дахь АН-ын бүлэг ямар ч байсан ийм өөрчлөлтийг хийхгүй гэсэн хатуу байр суурьтай гэдгээ мэдэгдэж буй юм. Үндсэн хуулийг парламентын нийт гишүүдийн 4/3-ын саналаар баталдаг. Үүнд хүргэхгүй байхын төлөө АН хатуу байр суурьтай байх болно” гэж байсан юм.

Тэгвэл, түүний ойрын хэд хэдэн хүнийг мөрдөх байгууллагын ажилтнууд уржигдар саатуулан баривчилжээ. Одоогоор Х.Тэмүүжин, түүниэй ойр дөт хүмүүсийг ямар хэргээр мөрдөн шалгаж байгаа нь тодорхой бус байна.

Б.БАЯР

Эх сурвалж: “Зууны мэдээ” сонин

Гамшиг, ослын эрсдэлийг тооцож, бэлтгэл, бэлэн байдлаа сайтар хангаж ажиллахыг анхааруулав

zulaa — Sat, 22 Mar 2025 10:43:15 +0800

УОК-ын орлогч дарга, ОБЕГ-ын дарга, хошууч генерал Г.Ариунбуян Говьсүмбэр аймагт ажиллах үеэрээ аймгийн Онцгой комиссын хуралдаанд оролцож, болзошгүй эрсдэлээс урьдчилан сэргийлэх чиглэлээр авч хэрэгжүүлсэн арга хэмжээтэй танилцжээ.

Гамшгийн эрсдэлийг бууруулах орон нутгийн зөвлөлийн 2025 оны үйл ажиллагааны төлөвлөгөөнд 3 бүлэг 20 арга хэмжээг хэрэгжүүлэхэд 50 сая төгрөгийг төсөвлөн, хэрэгжилтийг ханган ажиллаж байна.

Энэ онд 289.6 мян.толгой мал хаваржих бөгөөд “Шинэ хоршоо” хөдөлгөөний хүрээнд 69 хоршоо шинээр байгуулагдаж, 79 хоршооны 220 малчин өрх 8.7 тэрбум төгрөгийн хөрөнгө оруулалтын зээлд хамрагджээ.

Мөн хээрийн гал түймрийг илрүүлэх камерын хяналтын системийг байгуулж, үер, усны аюулаас урьдчилан сэргийлэх хяналт, шалгалтыг зохион байгуулах хүрээнд зохих арга хэмжээг шат дараатайгаар зохион байгуулахаар төлөвлөн ажиллаж байгааг танилцуулжээ.

ОБЕГ-ын дарга, хошууч генерал Г.Ариунбуян, Монгол орны ихэнх нутгаар хуурайшилт ихтэй, түймрийн эрсдэл өндөр байгаа тул урьдчилан сэргийлэх арга хэмжээг эрчимжүүлэх, аймгийн хэмжээнд тохиолдож болзошгүй гамшиг, ослын эрсдэлийг тооцож, бэлтгэл, бэлэн байдлаа сайтар хангаж ажиллах шаардлагатайг хэлсэн үгэндээ онцолжээ

Гунан үхрийн үнэ Говьсүмбэр аймагт хамгийн өндөр буюу ₮2.4 саяын үнэтэй байна

zulaa — Sat, 15 Mar 2025 18:24:22 +0800

Малын зах зээлийн дундаж үнийн 2025 оны хоёрдугаар сарын мэдээгээр,

атны үнэ 1.5 сая төгрөг болж, өмнөх оны мөн үеэс 166.6 мянган төгрөгөөр,
соёолон үрээний үнэ 1.2 сая төгрөг болж, 87.9 мянган төгрөгөөр,
хязаалан гунан үхрийн үнэ 1.6 сая төгрөг болж, 264.4 мянган төгрөгөөр,
эр хонины үнэ 270.0 мянган төгрөг болж, 61.0 мянган төгрөгөөр,
эр ямааны үнэ 170 мянган төгрөг болж, 33.5 мянган төгрөгөөр тус тус өссөн байна.

2025 оны хоёрдугаар сард эр үхрийн үнэ Говьсүмбэр аймагт хамгийн өндөр буюу 2. 4 сая төгрөг, Баян-Өлгий аймагт хамгийн бага буюу 970.0 мянган төгрөг байна.

Үхрийн хоёр метрээс дээш урттай шир 2025 оны хоёрдугаар сард 5.2 мянган төгрөг болж, өмнөх оны мөн үеэс 2.7 мянган төгрөгөөр буурсан бол цагаан ноолуурын 1 кг-ын дундаж үнэ 107.0 мянган төгрөг болж, өмнөх оны мөн үеэс 1.0 мянган төгрөгөөр өссөн байна.

Цагаан ноолуурын 1 кг-ын үнэ 2025 оны хоёрдугаар сард Дундговь аймагт хамгийн өндөр буюу 120.0 мянган төгрөг, Булган аймагт хамгийн бага буюу 100.0 мянган төгрөг байна.

Бизнес эрхлэгч эмэгтэйчүүдийг дэмжих хөтөлбөрт хамрагдахыг урьж байна

khulan — Thu, 29 Aug 2024 14:13:46 +0800

ХААН Банкны Жижиг дунд бизнесийн академиас бизнес эрхлэгч эмэгтэйчүүдийг дэмжихээр бизнесээ эрхлэн явуулахад дутагдаж буй ур чадвар, санхүүгийн болон санхүүгийн бус хэрэгцээ шаардлагуудыг судлан тодорхойлж, түүнд үндэслэн “Эмэгтэй бизнес эрхлэгчдийг дэмжих хөтөлбөр”-ийг боловсруулан 2020 оноос хэрэгжүүлж буй билээ.

Уг хөтөлбөрөөр дамжуулан эмэгтэй бизнес эрхлэгчдийг хувь хүн талаас нь хөгжүүлэх, манлайлах, өрсөлдөх чадварыг нэмэгдүүлэх, бизнесийн цар хүрээг нь тэлж, зах зээл эзлэлтээ өсгөх, үр ашгаа өндөр байлгахад нь бодитоор дэмжин ажиллаж, өнөөг хүртэл 1370 эмэгтэй бизнес эрхлэгчийг чадавхжуулаад байна.

Бизнесийн салбар дахь эмэгтэй манлайлагчдыг төрүүлэх зорилготой “Бизнес эрхлэгч эмэгтэйчүүдийг дэмжих хөтөлбөр”-т 2024 онд нэмэлтээр 350 эмэгтэй захирал, удирдлагуудыг хамруулах бөгөөд 2024.09.05-2024.09.26-ны хооронд ЖДБ-ийн академи, “OBSERVE Consulting Mongolia” болон бусад зөвлөх үйлчилгээний байгууллагын мэргэшсэн багш нар сургалтыг удирдан явуулна.

Хувь хүний хөгжил болоод бизнесийн удирдлага гэсэн үндсэн хоёр агуулгын хүрээнд сургалт явагдах тул тасралтгүй хөгжиж, бизнесээ өргөжүүлэх сонирхолтой эмэгтэй бизнес эрхлэгчдийг 2024 оны 9-р сарын 3-ны өдрийн дотор амжиж бүртгүүлэхийг урьж байна.

Хувь хүний хөгжил:

Амьдрах стратеги
Коучинг хийх чадвар
Багийг удирдах нь, манлайллын ур чадвар
Хоол хүнсний хүний биед гүйцэтгэх үүрэг, хооллолтын дэглэмүүд илчлэг тооцох аргууд

Бизнесийн удирдлага:

Бизнес төлөвлөлт ба гүйцэтгэлийн удирдлага
Процест суурилсан менежмент
Санхүүгийн тайланг унших, шинжилгээ хийх нь
ХрХХэрэглэгч, харилцагчийн менежмент

Хөтөлбөрт оролцогч нь байгууллагын захирал эсвэл удирдах албан тушаалтан байх ба байгууллагын хүний нөөцийн талаас илүү хувь нь эмэгтэй ажилтантай байх, цагаа зориулан сургалтад бүрэн хамрагдах зэрэг шаардлагуудыг тавьж байгаа болно.

Хугацаа: 2024.09.05-09.26-нд долоо хоног бүрийн пүрэв гарагт 09:30-13:00 цагийн хооронд (4 долоо хоног үргэлжилнэ)

Байршил: СБД, Хүүхдийн 100, ХААН Банкны Сөүл оффис, 3 давхар, Жижиг дунд бизнесийн академи

Бүртгэл: 2023.09.03-ны дотор доорх линкээр бүртгүүлээрэй.

Линк: https://survey.zohopublic.com/zs/XrBUNS

Хөтөлбөрийн тухай товч мэдээлэл

“Эмэгтэй бизнес эрхлэгчдийг дэмжих хөтөлбөр”-өөр дамжуулан бизнес эрхлэгч эмэгтэйчүүдийн удирдлагын манлайлал, хувь хүний хөгжил, бизнес эрхлэх ур чадварыг нь хөгжүүлээд зогсохгүй нэтворкинг арга хэмжээнүүдэд оролцуулан банкны шинэ тутам бүтээгдэхүүн үйлчилгээг танилцуулах, бизнесийн цар хүрээг нь тэлэх, түншлэлийг бий болгох, брэнд бүтээгдэхүүн үйлчилгээг нь олон нийтэд таниулах, борлуулалтын сувгийг нэмэгдүүлэх, бизнесээ дараагийн түвшинд гаргахад нь бодит дэмжлэг үзүүлсээр байна.

2024 онд Эмэгтэй бизнес эрхлэгчдийн цахим шилжилтийг дэмжих бизнесийн зээлийг ЕСБХБ-тай хамтран хэрэгжүүлэхээр болсон бөгөөд эмэгтэй бизнес эрхлэгчдийн бизнесээ цахимжуулах, цахим технологид суурилсан борлуулалтын сувгийг нэмэгдүүлэх чиглэлд онцгойлон анхаарч ажиллаж байна.

Яагаад эмэгтэй бизнес эрхлэгчид гэж?

Эмэгтэй бизнес эрхлэгчид бизнесийн салбарт өндөр амжилт гаргахад ямар хүндрэл бэрхшээлүүд тэдэнд тулгардаг талаар ХААН Банкны Жижиг дунд бизнесийн академиас судалгаа явуулж дараах голлох шалтгаан, нөхцөлүүдийг тодорхойлон гаргасан байдаг.

Үүнд:

-Дийлэнх эмэгтэй бизнес эрхлэгчид хувийн болон албаны санхүүгээ хэрхэн ялгах, санхүүжилт хэрхэн хүсэх, бизнесээ өргөжүүлэхэд юу шаардлагатай талаар мэдлэг мэдээлэл дутмаг

-Ихэвчлэн өрхийн бизнесээр үйл ажиллагаагаа эхлүүлдэг тул бизнесийн менежментийн мэдлэг бага

-Өрсөлдөх чадвараа нэмэгдүүлэх тал дээр өөртөө итгэх итгэл сул

-Гэр бүл, бизнесийн асуудлуудтай зэрэгцэн өөрийгөө хөгжүүлж, карьераа төлөвлөх хэрэгцээгээ орхигдуулсан зэрэг асуудалд шийдэл олоход нь дэмжлэг үзүүлж, санхүүгийн бус зөвлөх үйлчилгээ, сургалт хөгжлийн хөтөлбөрүүдийг хэрэгжүүлж байна.

Эмэгтэй бизнес эрхлэгчдэд чиглэсэн санхүүгийн боломжууд

ХААН Банк нь жендэрийн санхүүжилтийн хүрээнд эх үүсвэр татан төвлөрүүлэх ажлыг үргэлжлүүлэн хэрэгжүүлж, эмэгтэй бизнес эрхлэгчдэд зориулсан хөнгөлөлттэй нөхцөл бүхий зээл, санхүүгийн хэрэгцээ шаардлагыг тогтвортой ханган ажиллаж байна.

2024 онд Эмэгтэй бизнес эрхлэгчдийн цахим шилжилтийг дэмжих бизнесийн зээлийг ЕСБХБ-тай хамтран хэрэгжүүлэх болсон ба бизнесийн үйл ажиллагаагаа цахимжуулах буюу программ хангамж, техник хангамжийн шийдлүүдээс суурилуулан ашиг орлогоо нэмэгдүүлэхэд зориулсан хөнгөлөлттэй зээлийг санал болгож байна.

Зээлийн дэлгэрэнгүйг: https://bit.ly/Women-Loan

Цахим технологид суурилсан бүтээгдэхүүнүүд: https://bit.ly/KB-0807

Ирээдүйн амжилтын хаалгыг нээх ХААН Банкны “Цалинтай дадлагажих хөтөлбөр”

khulan — Wed, 14 Aug 2024 17:50:56 +0800

Оюутан залуусын ирээдүйн амжилтыг нээхэд чиглэсэн олон санаачилга, боломжийг санал болгодог байгууллага бол ХААН Банк. Ялангуяа мэдээллийн технологийн салбарт залуусын оролцоо, ур чадвар маш чухал байдаг тул энэ чиглэлд тус банкны зүгээс онцгой анхаарал хандуулж, залуу үеийнхэнтэй хамтран ажиллах боломжийг байнга эрэлхийлдэг. Үүний нэг жишээ бол "Цалинтай дадлагажих хөтөлбөр" юм. Энэхүү хөтөлбөрийг ХААН Банк зургаа дахь жилдээ амжилттай хэрэгжүүлж байгаа бөгөөд мэдээллийн технологийн чиглэлээр суралцаж буй оюутнуудад онолын мэдлэгээ бодит ажил дээр хэрэгжүүлэх боломжийг олгодог.

2024 оны хувьд тус хөтөлбөрт нийт 39 оюутан хамрагдаж, ХААН Банкны Мэдээлэл технологийн газруудад цалинтай дадлага хийлээ. Оюутнууд энэ хугацаанд банкны дотоод системийн хөгжүүлэлт, автоматжуулалтын шийдлүүд, дижитал бүтээгдэхүүнүүдийн сайжруулалт зэрэг олон чухал төсөлд оролцон мэргэжлийн ур чадвараа нэмэгдүүлсэн юм.

Paid internship гэж юу вэ?

Paid internship буюу цалинтай дадлага нь оюутан, залууст мэргэжлийн чиглэлээрээ бодит ажлын орчинд ажиллан онолын мэдлэгээ практиктай хослуулж, ажлын туршлага хуримтлуулах боломжийг олгодог хөтөлбөр юм. Энэхүү хөтөлбөр нь оюутнуудыг их сургуулийн ширээнд сурсан зүйлсээ бодит нөхцөлд хэрэгжүүлэхэд тусалж, санхүүгийн дэмжлэг үзүүлдэг онцлогтой.

Харилцаа холбоо үүсгэх нь

Дадлагажигч залуус зөвхөн мэргэжлийн ур чадвараа хөгжүүлээд зогсохгүй нэгдмэл хамт олны нэг хэсэг болдог. Тиймдээ ч хөтөлбөрийн явцад харилцан нэгнээсээ суралцах, туршлага солилцох, мэргэжил нэгтнүүдтэйгээ урт хугацааны харилцаа холбоо үүсгэдэг. Энэ нь зөвхөн банкны төдийгүй, Монголын мэдээллийн технологийн салбарын ирээдүйн лидерүүдийн сүлжээг бий болгох үндэс суурийг тавьж байна. Мөн аливаа шинэ санааг хамтдаа эрэлхийлж, асуудлыг шийдвэрлэх чадвартай багийг бий болгож, ирээдүйд хамтдаа томоохон төслүүдийг хэрэгжүүлэх боломжийг авчирдаг нь энэ хөтөлбөрийн нэгэн чухал давуу тал юм.

Карьерын сууриа тавих боломж

Карьерынхаа эхлэлийг зөв тавих нь залуу мэргэжилтнүүдийн амжилтын гол түлхүүр юм. Хөтөлбөрт хамрагдсанаар оюутнууд зөвхөн онолын мэдлэгээ гүнзгийрүүлэхээс гадна, бодит ажлын орчинд ажиллах туршлага хуримтлуулж, ирээдүйн карьераа амжилттай эхлүүлэхэд шаардлагатай бүхий л ур чадваруудыг эзэмших боломжтой. Тухайлбал, дадлагажигчид банкны өдөр тутмын үйл ажиллагаанд оролцон төслийн багийн гишүүн болж ажиллахдаа асуудал шийдвэрлэх, төсөл удирдах, бусадтай харилцах зэрэг ур чадваруудыг эзэмшдэг. Мөн дадлага хийх явцад оюутнуудын зорилго, хүсэл тэмүүлэл тодорхой болж, ирээдүйн карьераа ямар чиглэлд хөгжүүлэхээ ойлгож авдаг. Тиймээс тус хөтөлбөр зөвхөн нэг удаагийн дадлага биш, харин ирээдүйн мэргэжилтнүүдийн амжилтын замыг нээх чухал алхам юм.

Менторуудаас суралцах нь

Нэг зүйл онцолбол, “Цалинтай дадлагажих хөтөлбөр” нь оюутан залууст мэдээлэл технологийн салбарын шилдэг менторуудаас суралцах боломжийг олгодог. Тэдний өгсөн зөвлөгөө, чиглүүлэг нь оюутнуудын ирээдүйн карьерт томоохон түлхэц болж, амжилтын замыг нээхэд тусалдаг.

Банкны бүтээгдэхүүн үйлчилгээг цахимжуулах чиглэлд мэргэжлийн хүчирхэг баг ажилладаг. Харин оюутан залуус энэ багийн туршлагатай мэргэжилтнүүдээс зуны турш суралцдаг. Мэдээллийн технологийн тасралтгүй ажиллагааны захирал Д.Жанибек тус хөтөлбөрийг дүгнэн ярихдаа "Цалинтай дадлагажих хөтөлбөр нь залуу үеийнхэнд мэдлэг, туршлага, ур чадвараа хуваалцах боломж юм. ХААН Банкны мэдээллийн технологийн газарт дадлагажих нь оюутнуудад зөвхөн мэргэжлийн ур чадвараа дээшлүүлэхээс гадна, бодит төсөл дээр ажиллах, асуудлыг шийдвэрлэх, хамт олонтой нягт харилцаатай ажиллах зэрэг олон талын туршлагыг хуримтлуулах боломжийг олгодог. Миний хувьд энэ хөтөлбөрт оролцсон оюутнуудын эрч хүч, санаачилга, суралцах хүсэл эрмэлзэл маш их таалагдлаа. Бид тэдэнд зөвхөн практик ур чадвар олгоод зогсохгүй, өөрийгөө нээх, ур чадвараа хөгжүүлэх, ирээдүйн карьераа зөв чиглүүлэхэд нь дэмжлэг үзүүлэхийг зорилоо" гэлээ.

Оюутнуудын сэтгэгдэл

Тус хөтөлбөр нь залуусын хувьд мэргэжлийн туршлага олж авах, цаашдын карьерын чиглэлээ тодорхойлоход томоохон боломжийг олгожээ. Тухайлбал ШУТИС-ийн Мэдээлэл Холбоо Технологийн сургуулийн оюутан Ш.Хангарьд "Сайхан хамт олны дунд орж, нэгэн гэр бүл шиг болж ажилласан нь үнэхээр гайхалтай байлаа. Эхэндээ ийм дотно, найрсаг уур амьсгалтай гэж төсөөлөөгүй ч, хамт олон минь намайг элгэмсгээр хүлээн авсан. Дадлагын сүүлчийн өдөр зуслангийн хамгийн сүүлчийн өдөр шиг гунигтай байлаа. Ямартай ч би сургуулиа төгсөөд ХААН Банканд ажиллана гэсэн хамгийн эхний зорилго минь тодорхой болсон" гэв.

ШУТИС-ийн оюутан З.Эгшиглэн “Энэ дадлагаар шинэ мэдлэг, туршлага хуримтлуулж, олон найз нөхөдтэй боллоо. Найз залуутайгаа хамт хөтөлбөрт тэнцэж, дадлага хийх боломж олдсон. Багийн эерэг уур амьсгал, хамтран ажиллагсдын дэмжлэг, хамтын хөгжилд чиглэсэн орчин нь бусад байгууллагаас онцгой санагдсан. Жилийн өмнө тавьсан “ХААН Банканд ажиллана” гэсэн зорилгодоо хүрч, одоо хичээлийнхээ хажуугаар банканд үргэлжлүүлэн ажиллах болсондоо баяртай байна” хэмээлээ.

Эгшиглэнгийн хувьд дадлага нь зөвхөн ажлын туршлага хуримтлуулах биш, харин ирээдүйн карьерынхаа чиглэлийг тодорхойлох маш чухал алхам болсон байна. Найрсаг хамт олон, ажиллах эерэг уур амьсгал нь түүний хувьд урт хугацааны карьерын зорилгоо биелүүлэх замыг нь нээж өгчээ.

Бодит хувь нэмэр

Цахим банкаар тэргүүлэгч ХААН Банк цаашид ч дотоодын боловсролын салбарыг дэмжиж, ирээдүйн боловсон хүчнээ бэлтгэх зорилгоор “Цалинтай дадлагажих хөтөлбөр”-ийг тасралтгүй хэрэгжүүлэх аж. Энэ нь зөвхөн банкны салбарт ч бус, Монгол Улсын мэдээллийн технологийн салбарын хөгжилд үнэтэй хувь нэмэр оруулж буй томоохон үйл хэрэг юм.

Чойр-Сайншанд чиглэлийн 449-450 дахь километрт зам эвдэрчээ

zulaa — Wed, 24 Jul 2024 21:13:36 +0800

Дорноговь аймгийн Сайншанд сумын нутагт 2024 оны долоодугаар сарын 24 ны өдрийн 11:00-12:30 цагийн хооронд орсон хүчтэй аадар борооны улмаас А0102 дугаартай Чойр-Сайншанд чиглэлийн авто замын 449-450 дахь км-т байрлах Сайншанд гүүрний орох талын хэсгийн хөвөө их хэмжээгээр угаагдаж, зорчих хэсэгт нүхэн эвдрэл үүссэн байна.

А39 дугаартай Сайншанд-Ханги боомт чиглэлийн авто замын 10 цэгт хөвөөний хажуу хэсэгт сархиа үүссэн, авто замын зорчих хэсэг дээгүүр үерийн ус давж урссан бөгөөд үүнээс 14:57 цагийн байдлаар 11-14- км-ын 3 байршилд авто замын зорчих хэсэг рүү үерийн ус давсан хэвээр байна.

Зам хариуцагч Дорноговь АЗЗА ТӨХК авто замын бэлэн байдлыг хангуулахаар шуурхай ажиллаж байгаа тул иргэд, тээвэрчид та бүхэн анхаарал болгоомжтой зорчихыг Зам тээвэр хөгждийн төвөөс анхаарууллаа.